Pagpapaliwanag sa Kodigo ng mga Etika
Sa pahinang ito
Mga Etika ng Tagasalin at Interpreter
Ang mga tagasalin at interpreter na sertipikado ng NAATI ay nakatali sa isang kodigo ng mga etika at kodigo ng pag-uugali. Nangangahulugan ito na maaari kang magtiwala sa sinumang tagasalin o interpreter na sertipikado ng NAATI, katulad ng tiwala na ibinibigay mo sa isang doktor o accountant.
May tungkulin silang:
- maging tumpak
- maging walang kinikilingan at patas
- panatilihing kumpidensyal ang iyong impormasyon
- panatilihin ang kanilang mga kasanayan sa pamamagitan ng regular na propesyonal na pag-unlad
- gawin lamang ang trabahong kwalipikado silang gawin sa pamamagitan ng pagsasanay o mga kredensyal
Ang mga etikal na problema ay mga problema sa mga propesyonal na sitwasyon kung saan walang malinaw na tama o maling solusyon. Para sa mga interpreter, narito ang ilang may etika na problema na maaaring lumitaw sa kanilang trabaho:
- Nagmura ang isang kliyente sa harap ng mga pulis. Maaaring isipin ng interpreter na hindi naaangkop ang pagmumura sa pulis o alam niyang ang pagmumura ay magdudulot ng problema sa kliyente. Gayunpaman, ginagabayan ng kodigo ng etika ang interpreter upang maging tumpak at walang kinikilingan, at lahat ng bagay, kabilang ang pagmumura, ay bibigyang-kahulugan sa pulisya at vice versa.
- Hinihingan ng opinyon, tulad ng kung sa tingin nila ay nagsisinungaling ang isang tao. Ang kodigo ng etika ay gumagabay sa tagasalin upang maging walang kinikilingan at linawin ang mga hangganan ng kanilang tungkulin: Hindi sila nakikibahagi sa pagtataguyod, paggabay o pagpayo bilang bahagi ng kanilang pagsasalin o interpretasyon.
- Tinatanong kung inulit ba ng kanilang kliyente ang isang bagay sa nakaraang pagpupulong o appointment. Ang kodigo ng mga etika ay gumagabay sa interpreter na panatilihing kumpidensyal ang impormasyon. Kahit na tanungin ng doktor ang interpreter kung sinabi ba ng pasyente ang parehong impormasyon sa nakaraang appointment, hindi nila maibibigay ang impormasyong ito.
Sa Australia at New Zealand, mayroong apat na kaugnay na kodigo ng mga etika: AUSIT, ASLITA, NZSTI at SLIANZ.
- Kodigo ng mga Etika at Kodigo ng Pag-uugali ng AUSIT (Australian Institute of Interpreters and Translators) (2012): Lahat ng nakabase sa Australya at New Zealand na mga tagasalin at mga interpreter na nagtatrabaho sa mga wikang sinasalita
- Tandaan na ang AUSIT at NZSTI ay may parehong kodigo ng mga etika. Mababasa mo ang Kodigo ng Etika ng NZSTI dito
- Kodigo ng Etika at mga Alituntunin para sa Propesyonal na Pag-uugali ng ASLIA (Asosasyon ng mga Tagapagsalin ng Wikang Senyas ng Australya) (2007): Lahat ng Auslan na mga tagasalin at interpreter
- Kodigo ng mga Etika at Pag-uugali ng SLIANZ (Mga Tagapagsalin ng Wikang Senyas ng New Zealand) (2012): Lahat ng mga interpreter na nakabase sa New Zealand na nagtatrabaho sa NZSL
: Lahat ng nakabase sa Australya at New Zealand na mga tagasalin at mga interpreter na nagtatrabaho sa mga wikang sinasalitaAng pagkuha ng sertipikasyon mula sa NAATI ay kinabibilangan ng pagpapakita ng kaalaman at pag-unawa sa mga kaugnay na kodigo ng etika. Tinitiyak ng NAATI na nauunawaan ng tagasalin o interpreter ang kodigo ng etika at kung paano naaangkop ang mga prinsipyo sa kanilang trabaho, at alam kung paano sila tutugon sa mga etikal na problema.
Magbasa nang higit pa tungkol sa iba’t ibang kodigo ng etika at pagsusulit sa Etika ng NAATI dito
Mga paglabag sa kodigo ng etika
Paminsan-minsan, natutuklasan na ang isang tagasalin o interpreter ay hindi sumunod sa mga prinsipyo, na nagreresulta sa pinsala o pagkahamak ng kliyente, kaniyang employer o kapwa practitioner. Ito ay karaniwang tinutukoy bilang isang ‘paglabag’.
Seryoso ang mga potensyal na paglabag sa kodigo ng etika ng NAATI, AUSIT, ASLITA, NZSTI at SLIANZ. Mababasa mo ang Patakaran sa mga Reklamo ng NAATI para sa payo kung paano mag-iimbestiga at tutugon ang NAATI sa anumang mga paglabag na iniulat sa NAATI. Maaari ka ring maghain ng reklamo nang direkta sa tagasalin o interpreter, sa kaniyang employer, o sa kaniyang propesyonal na asosasyon kung siya ay isang miyembro (AUSIT, ASLITA, NZSTI o SLIANZ).