Fa'alauiloale tāua o lo tatou femalamalamaa'i

O le mata’upu

O le manino o feso’ota’iga e tāua mo le tausiga saogalemū ma le manuia o le soifua maloloina. E fesoasoani i tagata e malamalama ai i lo latou soifua maloloina, faia fa’ai’uga mautonu ma talia tausiga sa’o i taimi tala feagai.

O fa’afitauli i le gagana i le vā o se foma’i ma se tagata o gasegase, e ono fenumia’i ma lē saogalemū ai le ‘au’aunaga soifua maloloina. O fa’amatalaga tāua e mafai ona lē malamalama pe misia, ma faigata ai ona faia ni fesili, mulimulita’i i fautuaga a foma’i, pe mautinoa ona talitonuina filifiliga e faia mo togafitiga. E mafai ona i’u ai i le sesē ma fa’ai’uga lē amiotonu i le soifua maloloina.

O le fa’alagolago i tagata o ‘āiga poo le ‘aufaigaluega e le’i a’oa’oina e fa’amatala’upu e mafai ona lamatia ai ola o tagata. E ono lē sa’o fa’amatalaga, matala i tua fa’amatalaga puipuia, ma ono faigata ma taofiofi ona faia talanoaga i mata’upu ma’ale’ale.

O fa’amatala’upu pasia e le NAATI e fesoasoani ia saogalemū ma ‘auai fa’atasi tagata i ‘au’aunaga soifua maloloina. Latou te lagolagoina feso’ota’iga e manino, sa’o ma puipuia i le vā o le tagata gasegase ma foma’i, ina ia mautinoa ua mafai ona malamalama tagata uma.

Fa’amatala’upu pasia mo ‘au’aunaga soifua maloloina lē fa’aitū’au

E tāua lo tatou femalamalamaa’i, o le fa’alauiloa fa’aleatunuu lea a le NAATI e tulei ai fa’amatala’upu ua pasia e le NAATI e galulue i nofoaga o ‘au’aunaga soifua maloloina. E una’ia ai tagata gasegase e talosaga se fa’amatala’upu ma lagolagoina ai ‘au’aunaga soifua maloloina e silafia le tāua o fa’amatala’upu ua pasia.

O le fa’alauiloa lenei e fa’apupula ai le tāua o le sao o fa’amatala’upu pasia a le NAATI i le lagolagoina o:

• Saogalemū o togafitiga ma fa’atagana faia ma le silafia
• Mamalu o tagata gasegase ma le tulaga tuto’atasi
• Aiā tutusa i ‘au’aunaga soifua maloloina

Aiseā e fa’aaogāina ai se fa’amatala’upu pasia e le NAATI?

O le pasia o se fa’amatala’upu e le NAATI, o le fua lea o le agava’a o se tagata e fa’amatala’upu ai i Ausetalia. O le pasia e le NAATI, o lona uiga o lea fa’amatala’upu:

• ua su’esu’eina ona tomai ma ni fa’ailoga
• e maualuga lona silafia i le Igilisi ma le isi ana gagana
• e saisaitia e le ta’iala o amioga amiotonu.

O le fa’aaogāina o fa’amatala’upu ua pasia e le NAATI e lagolagoina ai ‘au’aunaga soifua maloloina e saogalemū, amiotonu ma sili ona lelei, ona e mafai ona e fa’atuatauaina e faia ma le fa’amaoni o latou tiute.

Sa’ili se fa’amatala’upu ua pasia

A e mana’omia se fa’amatala’upu e fesoasoani i mata’upu ma le mālō poo se ‘au’aunaga soifua maloloina, e mafai ona e talosaga i lea ‘au’aunaga e fa’atulaga se fa’amatala’upu mo ‘oe. I le taimi e fa’atulaga ai se asiasiga poo se fa’atalanoaga, e mafai ona e fai iai ‘Ou te mana’omia se fa’amatala’upu’ ma ta’u iai lau gagana. E mafai fo’i ona e talosaga mo se fa’amatala’upu tane pe o se tama’ita’i pe a e mana’o ai. E tele lava ina maua fua ‘au’aunaga a fa’amatala’upu i mata’upu a le mālō poo ‘au’aunaga soifua maloloina i Ausetalia. A e mana’o i se fa’amatala’upu tū ma’oti e fesoasoani i se galuega poo se fonotaga fa’apisinisi, e mafai ona maua i le lisi a le NAATI o loo i luga o le ‘upega tafā’ilagi. E mafai ona e mauaina ai fa’amatala’upu ua pasia i le tele o gagana, nofoaga ma itū’aiga ‘au’aunaga e fa’apitoa iai, e aofia ai pisinisi o loo lagolagoina e le NAATI i ‘au’aunaga o gagana.