Filifiliga o se tagata faigaluega agava’a mo le galuega: Se va’aiga lautele i fa’ailoga a le NAATI
I le itulau lenei
I taimi e te mana’omia ai ona fa’aliliu se pepa pe feso’ota’i ma seisi tagata i se gagana ‘ese, e tāua ona maua seisi ua iai tomai talafeagai e fesoasoani atu ia te ‘oe. O tagata fa’aliliu’upu e galulue i le fa’aliliuina o le gagana tusia, ae o fa’amatala’upu e galulue i le fa’amatalaina o le gagana tautala poo le gagana saini.
O le faiga o Tusi Pasi a le NAATI e aofia ai fa’ailoga e tolu mo fa’aliliu’upu ma fa’ailoga e ono mo fa’amatala’upu. “O le ta’iala lenei e fesoasoani ai ia oe ete malamalama ai i fa’ailoga ta’itasi”.
E lē ofoina e le NAATI su’ega i gagana uma poo tulaga uma. A fa’apea e leai se su’ega i lau gagana, e mafai lava e tagata fa’aliliu’upu ma fa’amatala’upu ona mauaina fa’ailoga Fa’ata’ita’i Amana’ia e “fa’ailoa ai ua mae’a ona latou faia a’oga ma ua latou ‘ausia le tulaga mana’omia o le gagana”.
Fa’autagia mai, tusa lava pe tutusa fa’ailoga o fa’aliliu’upu ma fa’amatala’upu ae ono ‘ese’ese vaega e fa’apitoa iai o latou tomai. Fa’aaogā le tusi telefoni ma feso’ota’iga a le NAATI e sa’ili ai tagata faigaluega ua pasia ma vaega e fa’apitoa iai o latou tomai ma fa’ailoga.
Mana’oga amata fa’amalosia
Ina ia pasia e le NAATI, o tagata fa’aliliu’upu ma fa’amatala’upu uma e tatau ona fa’amalieina mana’oga amata fa’amalosia. O fa’ailoga ta’itasi e tofu ma mana’oga amata fa’amalosia (fa’ata’ita’iga, e mana’omia seisi maualuga o le a’oga), ae aofia i vaega uma le:
- A’oga aloa’ia i le fa’aliliu’upu ma le fa’amatala’upu
- Tulaga maualuga o le silafia i le gagana Igilisi poo le Auslan
- Malamalama i amioga amiotonu: Silafia ma malamalama i ta’iala o amioga pulea o loo saitia ai le galuega fa’aliliu’upu ma fa’amatala’upu
- Malamalama i isi aganu’u: “Silafia ma lava le tomai mana’omia e galue ai ma isi tū ma aganu’u i totonu o Ausetalia”.
Fa’ailoga fa’aliliu’upu
E tolu fa’ailoga fa’aliliu’upu e fa’aalia ai tulaga ‘ese’ese o le tomai ma le poto masani.
O tagata e ‘ūmia fa’ailoga fa’aliliu’upu e mafai ona latou fa’aliliuina pepa e lavelave ma faigofie mai se tasi gagana i seisi gagana. E mafai fo’i ona latou iloiloina ma teuteu se pepa ua fa’aliliuina ina ia mautinoa ai o loo sa’o. O fa’aliliu’upu e mafai ona fa’aliliuina i le itū e tasi poo le lua: fa’ata’ita’iga, mai le Polisi i le Igilisi ma/poo le Igilisi i le Polisi.
Fa’aliliu’upu Fa’ata’ita’i Amana’ia e le’i su’eina o latou tomai e le NAATI, ae ua mae’a ona faia se a’oga pu’upu’u ma fa’amalieina mana’oga amata fa’amalosia, ma ua iai le poto masani i le galuega fa’aliliu ‘upu. “E masani ona galulue ai tagata i gagana e lē o mafai ona su’eina e le NAATI i le taimi nei”.
A fa’apea e leai se faaliliu’upu o ‘ūmia se tusi pasi mo se gagana, atonu e talosaga i se Fa’aliliu’upu Fa’ata’ita’i Amana’ia na te faamae’aina le galuega e pei lava o se tagata ua ‘ūmia se tusi pasi.
Fa’aliliu’upu Pasia ua mae’a ona faia a’oga i le tulaga mana’omia ma fa’amalieina mana’oga amata fa’amalosia, ma ua su’esu’eina o latou tomai e le NAATI. O le fa’ailoga aupito maualuga lea i le Faiga o Tusi Pasi.
Galuega e iloiloina e le NAATI- Fa’aliliuina o pepa e lavelave ae lē fa’apitoa sona mata’upu
- Iloiloina o se fa’aliliuga e lavelave ae lē fa’apitoa sona mata’upu
Fa’aliliu’upu Maualuga Pasia maua le fa’ailoga maualuga i le faiga sa iai o tusi pasi a le NAATI (luma atu o le 2018). Ua lē o toe iai se su’ega ae o loo ‘ūmia pea e nisi o tagata fa’aliliu’upu le fa’ailoga lenei.
Fa’ailoga fa’amatala’upu
E ono fa’ailoga mo le galuega fa’amatala’upu i ni nofoaga e lua e fa’atino ai: fa’amatala’upu ma tagata lautele ma fa’amatala’upu i fonotaga.
Fa’amatala’upu Fa’ata’ita’i Amana’ia e le’i su’eina o latou tomai e le NAATI, ae ua mae’a ona faia se a’oga pu’upu’u ma fa’amalieina mana’oga amata fa’amalosia, ma ua iai le poto masani i le galuega fa’amatala’upu. E masani ona galulue ai tagata i gagana e leai ni su’ega a le NAATI o faia ai.
A fa’apea e leai se tagata e ‘ūmia se tusi pasi i se gagana, e ono vala’au i se Fa’amatala’upu Fa’ata’ita’i Amana’ia na te faia se galuega e pei lava o se tagata ua ‘ūmia se tusi pasi.
Fa’amatala ‘Upu Fa’aleoleo Pasia ua su’esu’eina o latou tomai fa’amatala’upu i fa’atalanoaga lautele ma faigofie, i le vā o ni tagata se to’alua. O le ‘upu ‘fa’aleoleo’ o loo fa’aaogāina ona e le’i su’esu’eina au’ili’ili e le NAATI le tele o tomai faamatala’upu e mana’omia mo le tulaga Tusi Pasi Fa’amatala’upu.
Galuega e iloiloina e le NAATI- Fa’amatala’upu o fai se talanoaga faafesāga’i (poo le video) ma vavā mamao (telefoni) ma se tagata e tautala i le Igilisi ma se tagata e tautala i seisi gagana, ae fa’atonutonu e nisi.
Fa’amatala’upu Pasia e mafai ona fa’amatalaina mata’upu lavelave i le tele o tulaga. Ua latou pasia le su’ega Fa’amatala’upu Fa’aleoleo Pasia atoa ai ma le su’ega mo le Fa’amatala’upu Pasia ma le NAATI.
Galuega e iloiloina e le NAATI- Fa’amatala ‘upu i se talanoaga i le vā o ni tagata se to’alua
- Fa’aliliu faitau se pepa mai se tasi gagana (tusia) i seisi gagana (tautala).
- Fa’amatala’upu i se saunoaga a se tagata (faia fa’a-fuai’upu ma faia fa’atasi)
Fa’amatala’upu Fa’apitoa Soifua Maloloina o tagata ua lava le poto masani ma le silafia i le galuega fa’amatala’upu i ‘au’aunaga soifua maloloina. Ua latou pasia se su’ega fa’apitoa i mata’upu tau togafitiga fa’afoma’i atoa ai ma le tiute o fa’amatala’upu i ‘au’aunaga soifua maloloina, e aofia ai se fesili i le gagana tautala ma le su’esu’eina o mafua’aga o gasegase. Ua latou pasia fo’i se su’ega fa’amatala’upu e iloiloina ai lo latou tomai e fa’amatala feso’ota’iga i le vā o foma’i ma tomai fa’apitoa (e pei o taimi e talanoa ai se foma’i i seisi tagata e iai tomai soifua maloloina e uiga i se gasegase) atoa ai ma le fa’amatala’upu i mata’upu o gasegase o le mafaufau. Na galulue i latou o Fa’amatala’upu Pasia ma faia ai a’oga ae le’i fa’asolo i le tulaga lenei.
Galuega e iloiloina e le NAATI- Su’ega malamalama soifua maloloina
- Fa’amatala fa’a-fuai’upu se saunoaga
- Fa’amatala’upu fai fa’atasi o se saunoaga i mata’upu o gasegase o le mafaufau
- Fa’amatala’upu i se felafolafoa’iga i se gagana e tasi (fa’amatalaina o se felafolafoa’iga a ni tagata i le Igilisi i se tulaga lavelave)
Fa’amatala’upu Pasia Fa’apitoa i le Tulafono o tagata fa’amatala’upu ua lava le silafia ma le poto masani i le fa’amatalaina o mata’upu i le tulafono. Ua pasia a latou su’ega i mata’upu lautele o le tulafono ma le tiute tau’ave o fa’amatala’upu i fa’amasinoga ma isi tulaga. Ua pasia fo’i a latou su’ega fa’amatala’upu e iloiloina ai lo latou tomai e fa’amatala feso’ota’iga i le vā o tagata ma tomai i le tulafono (e pei o felafolafoa’iga i le vā o se fa’amasino ma se lōia) ma taimi e fesiligia ai molimau i se potu fa’amasino. Na galulue o Fa’amatala ‘Upu Pasia ma a’oa’oina ai ae le’i fa’asolo i le tulaga lenei.
Galuega e iloiloina e le NAATI- Su’ega malamalama i le tulafono
- Fa’ata’ita’iga o fesili ma tali (fa’amatala’upu fa’a-fuai’upu o fesili ma tali fa’ata’ita’i i se fa’amasinoga)
- Fa’amatala’upu fa’a-fuai’upu o se saunoaga
- Fa’amatala’upu i se felafolafoa’iga i se gagana e tasi (fa’amatalaina o se felafolafoa’iga a ni tagata i le Igilisi i se tulaga lavelave)
Fa’amatala’upu Pasia Fonotaga e mafai ona fa’amatalaina mata’upu lavelave ma fa’apitoa i fonotaga tetele fa’avāomālō ma totonu o se atunu’u, e pei o feutaga’iga o se feagaiga ma fonotaga fa’a-Univesitē. O fa’amatala’upu nei e tele ina a’oa’oina faapitoa mo fa’amatala’upu i fonotaga ma faalaua’itele lo latou poto masani. O latou fa’ailoga e tasi le itū e aga’i iai (fa’ata’ita’iga, Sapanī i le Igilisi poo le Igilisi i le Auslan), e ui o nisi fa’amatala’upu e ‘ūmia fa’ailoga i se tu’u fa’atasiga o ni gagana.
Galuega e iloiloina e le NAATI- Fa’amatalaina o se saunoaga (fa’amatala’upu fa’a-fuai’upu) o se saunoaga e le’i va’ai iai
- Fa’amatala’upu fa’alogo o se saunoaga (fa’amatala’upu fa’atasi) o se saunoga ua va’ai pe le’i va’ai iai