O le galulue fa’atasi ma se fa’amatala ‘upu e fesoasoani i le lelei o le feso’ota’iga i lou vā ma ni tagata e ‘ese’ese a outou gagana. O fa’amatala’upu e le ‘auai i le talanoaga; o latou o le auala o feso’ota’iga.

O se fa’amatala’upu ua pasia e le NAATI e:

• tapenaina le galuega ua tofia iai e auala i le su’esu’eina o le mata’upu e fa’avae i fa’amatalaga ua ia mauaina
• fa’amatala sa’o mea uma e aunoa ma se fa’aitū’au
• ‘aua le fa’aopoopoina, to’ese pe suia se fa’amatalaga, ma ‘aua le ofoina ni ona manatu, fautuaga pe fa’auigaina se fa’amatalaga
• talosaga mo se fa’amaninoga pe toe fai fa’alua pe a mana’omia ina ia sa’o ai
• pulea tulaga e felāvasa’i ai fa’amatalaga i se talanoaga
• malu puipuia fa’amatalaga uma e fa’atatau i le galuega na tofia iai, e aofia ai fa’amatalaga uma na faia i le talanoaga.

Tausisi i le fa’aalia iai o le fa’aaloalo ma mulimuli i ta’iala nei e mautinoa ai le sologa lelei o le mata’upu mo tagata uma e ‘auai.

Ae le’i faia le talanoaga

Filifili le itū’aiga fa’amatala’upu ma le nofoaga tala feagai e faia ai

I le taimi e fa’avasega ai se fa’amatala’upu, fa’amautū le itū’aiga e faia ai ma le auala e te fa’amoemoe e ‘auai ai le fa’amatala’upu, ma mautinoa o iai uma ni masini e mana’omia. A e lē mautinoa, e mafai e le ‘au’aunaga i gagana poo le fa’amatala ‘upu ona fautuaina se auala sili ona tala feagai.

Itū’aiga o fa’amatala’upu

Fa’amatala ‘upu fa’a-fuai’upu: E fa’atali le fa’amatala’upu se’i uma le fa’amatalaga a se tagata ona fa’ato’a ia fa’amatalaina lea i le isi gagana. O le itū’aiga lea e tele ina fa’aaogā i taimi faatulagaina poo fonotaga laiti. O le talanoaga e ono fa’aluaina atu le ‘umi nai lo se talanoaga i se gagana e tasi, e tatau ai ona fa’a-avanoa se taimi fa’aopoopo.

Fa’amatala’upu fa’atasi: E fa’aliliu e le fa’amatala ‘upu le gagana i le taimi e tasi, e tele ina fa’aaogā ai masini faapitoa e pei o mea fa’alogo poo potu fa’amatala ‘upu. O le itū’aiga lenei e aogā tele mo fonotaga tetele, poo fa’atalanoaga a se vaega e mana’omia ai ona sologa lelei feso’ota’iga. Ona o le tulaga fitā i le mafaufau o le galuega lenei, e fautuaina ai le fa’avasega o ni fa’amatala’upu se to’a lua e fesuia’i ina ia fa’aauau ona sa’o ma taofia le lē lavā o le fa’amatala’upu.

Fa’atinoga o galuega fa’amatala’upu

Fa’afesāga’i (i se nofoaga pe feiloa’i): O le fa’amatala’upu fesāga’i e sili ona aogā mo tulaga lavelave ona e mafai ai ona iloa nisi o mea lē fa’aleoa. O lona uiga o le a lua fa’atasi ma le fa’amatala’upu i se potu. E ono faigatā ona fa’avasega le itū’aiga lenei i nu’u ma itūmālō maotua ma nisi o gagana.

Video: O le fa’amatala’upu i luga o se video e lona lua i le fa’amatala’upu fesāga’i, ona e mafai ona iloa ai vaega lē fa’aleoa o tagata ‘auai. E aogā le fa’amatala’upu i le video pe a lē maua se fa’amatala’upu e auai atu i se nofoaga, ae maise i galuega pupu’u ma gagana e faigatā ona maua ai fa’amatala’upu. E tala feagai fo’i le fa’amatala’upu i le video mo le Auslan ma gagana tautala, ae mana’omia le ola lelei o le ‘upega feso’ota’i ma masini.

Telefoni: O le fa’amatala’upu i luga o le telefoni o le itū’aiga e sili ona faigofie ma ta’atele. E sili atu ona aogā mo feso’ota’iga pupu’u ma lē lavelave.

Filifiliga se fa’amatala’upu sa’o

• Ia mautinoa o se fa’amatala’upu ua pasia e le NAATI. E mafai ona siaki pe ua pasia e le NAATI e fa’aaogāina ai lana Numera Faigaluega Pasia (CPN).
• ‘Aua le fa’aaogāina tagata o ‘āiga ma uō e fai ma fa’amatala’upu, tusa pe faigofie atu. E ono fa’aitū’au, lē lava le a’oa’oina poo le tomai i le gagana. E ono lamatia ai le tulaga o fa’amatalaga puipuia, sa’o ma le agava’a tala feagai.
• Fa’amautinoa ua fa’amalieina e le fa’amatala’upu mana’oga o le galuega. E te mana’omia se fa’amatala’upu o se itupā e tasi? E tatau ona iai so latou tomai fa’apitoa i se mata’upu, e pei o le soifua maloloina poo le tulafono?

Logo le fa’amatala’upu

I tulaga uma e mafai ai, logo le fa’amatala’upu i nisi o vaega ae le’i amataina lana galuega. O le logo lenei e ta’u ai iai le mafua’aga o le fonotaga, o ai o le a ‘auai, ma nisi o vaega tāua e ao ona silafia e le fa’amatala’upu. Tusa pe o se talanoaga pu’upu’u ae le’i amataina, e ono taofia ai le tele o fa’auilāvea ma sologa lelei ai feso’ota’iga.

O le logo e mafai ona aofia ai:

• Tu’uina atu o fa’amatalaga e lagolago ai le mata’upu, sini e fia ‘ausia ma sui ‘auai.
• Logo iai nisi o gagana fa’apitoa, ‘upu fa’apitoa i se mata’upu poo ‘upu fa’aaogā lautele ina ia tapena iai le fa’amatala’upu ma sa’o ai ona ia fa’amatalaina.
• Ta’u iai pe o le mata’upu o le fonotaga e fa’ao’otia loto, fa’atekonolosi, pe ma’ale’ale i finagalo.

Afai e lavelave le mata’upu, tu’u ia lava se avanoa i le fa’amatala’upu e tapena ma su’esu’e ai pe a mafai. O lenei tapenaga e fesoasoani i le sa’o o le fa’amatalaina ma fa’amāmā ‘avega i le galuega a le fa’amatala’upu i le talanoaga.

Fuafua mea mana’omia

Fa’amatala’upu fa’afesāga’i e mana’omia ai ‘oe, le fa’amatala’upu ma le isi tagata e ‘auai fa’atasi i se nofoaga e tasi. Fa’atulaga nofoa fa’atāfatolu, mo le tagata gasegase, le fa’amatala’upu ma le foma’i. E fa’amautinoa ai le manino o feso’ota’iga ma aofia fa’atasi uma ai tagata.

Mo fa’amatala’upu Auslan: E tatau ona nofo pe tū le fa’amatala’upu i tafatafa ane o le foma’i ma faafesaga’i ma le gasegase. E mautinoa ai le va’ai sa’o o le tagata logonoa i le tagata o loo tautala ma lana gagana fa’aletino. Mo talanoaga e ‘umi se taimi, e mana’omia ni fa’amatala’upu se to’a lua e fesuia’i.

Telefoni ma fonotaga i le video e mafai ai ona fetu’utu’una’i – o le fa’amatala’upu poo le isi tagata lua te fa’atasi, pe o tagata uma e ‘ese’ese nofoaga o loo iai. Ia mautinoa o loo ola lelei uma masini mana’omia ae le’i amataina le fonotaga.

Manatua ia fa’a-avanoa se taimi mo le fa’amatalaina i le isi gagana. O talanoaga e ‘umi atu nai lo talanoaga i se gagana e tasi.

I le taimi o le talanoaga

Mea e faia

• Ia mautinoa ua fa’afeiloa’i muamua le fa’amatala’upu ma ona tiute . E mafai ona amata i lou fa’ailoaina fa’apenei: “O la tatou fa’amatala’upu lenei, o le a fesoasoani ia tatou feso’ota’iga i le asō”. “O fa’amatalaga uma e faia o le a fa’amatalaina sa’o i auala puipuia”. E ono fa’afeiloa’i e le fa’amatala’upu ia lava. Fa’amanatu i tagata ‘auai o le fa’amatala’upu e tautala i le tagata muamua (e pei o “a’u”, “tatou”) ina ia sologa lelei ai le talanoaga.
• Tautala sa’o i le isi tagata, ae lē o le fa’amatala’upu. Fai iai “O a mai ‘oe i lenei aso?” ae lē o le “Fesili iai pe o a mai ia.” Va’ai i mata o le isi tagata i le talanoaga, se’i vaganā se tulaga e lē tala feagai ai ma lana aganu’u.
• Fa’aaogā le gagana manino ma faigofie. ‘Aua le fa’aaogāina ‘upu ‘agana, fa’apitoa, fa’apu’upu’uga poo fa’ata’ita’iga fa’atusa lavelave. Fai ma manava mo se taimi e fa’amatala ai i le isi gagana.
• Fa’atali se’i uma ona tautala le fa’amatala’upu ae le’i toe fa’aauauina. E mautinoa ai le sa’o ma taofia ai le tele o fa’amatalaga.
• Onosa’i. O nisi gagana e mana’omia le sili atu pe itiiti ‘upu e fa’amatala ai le uiga o se fuai’upu. O le motu o le tautala a le fa’amatala’upu o le mea e masani ai.
• Fa’amanino pe a mana’omia . A iai se mea e lē o manino, talosaga i le fa’amatala’upu e toe ta’u atu pe fa’amatala atu. Una’ia le fa’amatala’upu e leo tele pe a iai se mea e fia fa’amanino. A mana’omia le fa’amatala’upu e toe fa’amanino se mea, fai iai e ta’u i le isi tagata le mea o loo fesiligia.

Mea e alo’ese ai

• ‘Aua le fa’auilāvea i le fa’amatala’upu poo le isi tagata ae le’i mae’a sana fuai’upu. O fa’auilāvea nei e i’u ai i le fenūmia’i ma sese feso’ota’iga.
• ‘Aua le fesili i le fa’amatala’upu mo se manatu poo se fautuaga. O lana matāfaioi o le fa’amatala’upu, lē o le fa’aleleiga, fai ma sui pe ofoina ni ona manatu.
• ‘Aua e te faia seisi talanoaga ma le fa’amatala’upu. E fa’amatala uma e le fa’amatala’upu tala e te tautala ai, e tatau ai ona e lē faia se tala e te lē mana’o e fa’amatala i le isi gagana.

I le mae’a ai o le talanoaga

• A mana’omia, toe silasila i le talanoaga. Talanoa i le fa’amatala’upu pe a iai ni mata’upu na alia’e pe mana’omia ai se fa’amatalaga. Talia ni fautuaga i mea e ono fa’aleleia. O fa’amatala’upu e galulue ma le to’atele o tagata agava’a ma e mafai ona maua atu ai fautuaga i auala e fa’aleleia ai feso’ota’iga i ni talanoaga i le lumana’i.
• Tausisi i le malu puipuia o fa’amatalaga. Va’ai i talanoaga na fa’aaogā ai se fa’amatala’upu e pei lava o isi talanoaga. O fa’amatalaga uma na fa’aalia ai e malu puipuia.

Lomiga fesoasoani fa’aopoopo

Mo nisi fa’amatalaga i le galulue ma fa’amatala’upu, asiasi i le:

• Ta’iala Lautele a le AUSIT mo le Galulue ma Fa’amatala’upu
• Tai’ala Lē Tumau a le Mālō Vitoria: Auala e galulue ai ma fa’amatala’upu ma fa’aliliu’upu
• Ta’iala a le ‘Au’aunaga Soifua Maloloina i Queensland mo fa’amatala’upu
• Ta’iala mo ‘Au’aunaga i Gagana: Ta’iala a le Mālō Ausetalia mo ‘Au’aunaga i Gagana